اسلام آباد: امریکا نے پاکستان کے توانائی کے شعبے میں ایک بڑے منصوبے کا اعلان کرتے ہوئے کہا ہے کہ وہ تیل و گیس کی تلاش، پیداوار اور انفراسٹرکچر کی بہتری کے لیے 7 ارب 50 کروڑ ڈالرز کی سرمایہ کاری کرے گا۔
ذرائع کے مطابق یہ سرمایہ کاری آئندہ چند برسوں میں مرحلہ وار کی جائے گی، جس کا مقصد پاکستان کو درپیش توانائی بحران پر قابو پانے، مقامی پیداوار بڑھانے اور درآمدی انحصار کم کرنے میں مدد فراہم کرنا ہے۔
امریکی حکام کا کہنا ہے کہ اس سرمایہ کاری کے نتیجے میں پاکستان میں جدید ٹیکنالوجی منتقل ہوگی، روزگار کے ہزاروں نئے مواقع پیدا ہوں گے اور ملکی معیشت کو استحکام ملے گا۔
پاکستانی وزارتِ توانائی کے مطابق اس معاہدے کے بعد تیل و گیس کی تلاش کے نئے منصوبے شروع کیے جائیں گے، ریفائنری سسٹم کو جدید بنایا جائے گا اور گیس کی ترسیل کے نیٹ ورک کو بہتر بنایا جائے گا۔
اقتصادی ماہرین کے نزدیک یہ سرمایہ کاری پاکستان کے لیے ایک گیم چینجر ثابت ہو سکتی ہے، کیونکہ توانائی کے شعبے کی بہتری نہ صرف صنعتی ترقی میں مددگار ہوگی بلکہ براہِ راست غیر ملکی سرمایہ کاری میں اضافے کا سبب بھی بنے گی۔
